Relatório hussi Missão Católica iha Laleia.

Iha loron sia, fulan novembro, tinan 2014, paróquia Laleia hala’o procissão to’o baliza ho Manatuto atu entrega ba paróquia ne’ebá Cruz Jovem no Nª Sª Peregrina nia ilas. Ema Laleia, Samalai no Cairui ne’ebé acompanha procissão, balu tanis, balu hakilar, dehan: “Maromak ba ona”, “Maromak ba ona”, “adeus”, “adeus”, “adeus”. Ha’u sente tristeza kle’an hanessan lalehan monu tun iha ha’u-nia ulun, tanba se povo fiar duni katak “Maromak ba ona” então Kreda nia hanorin iha tinan atus lima nia laran to’o iha ne’ebé? Ka iha tinan atus lima nia laran povo simu de’it hussi Igreja Católica buat ne’ebé superficial maibé la simu duni Kreda nia Fiar? No ha’u sei hela iha paróquia ne’e atu halo saída? Buka hatudu ba sarani sira katak Maromak la hussik ita maibé nafatin hamutuk ho ita, hanessan Moisés hanorin ba nia povo (haree Ex 17,1-7), sai ha’u-nia knaar dahuluk nu’udar pároco.

Oras ne’e, ne’ebé bessik atu entrega responsabilidade Paróquia Laleia nian ba amo-lulik seluk, ha’u iha obrigação atu buka halo síntese kona-ba realidade eclesial paróquia nian atu pároco foun bele hatene saída mak ita halo iha tinan ikus sira ne’e, dificuldades no desafios ne’ebé ita hassoru, no, importante liu, bele facilita nia serviço hodi prepara, hamutuk ho Conselho Pastoral Paroquial, programa paróquia nian ba tinan pastoral foun.

Loos duni katak relatório ida-ne’e iha interesse liuliu ba Cúria Diocesana no ba sarani paróquia Laleia, maibé ha’u hanoin atu publica mós iha internet atu, dada hussi realidade específica ida, mak paróquia Laleia, amo-lulik sira seluk, madres no sarani tomak ne’ebé hakarak hola parte iha Kreda nia hafoun an, iha tempo ida-ne’e ne’ebé sociedade Timor hassoru problemas foun oioin, bele hala’o nafatin reflexão kona-ba oinsá mudanças sociais hirak ne’e sai desafio boot ba pastoral, ba moral no fiar sarani iha Terra de Santa Cruz e de Santa Maria. Loos tebes katak realidade pastoral iha sukaer-laran – região Manatuto, Lacló, Vemasse no Laleia – la hanessan região sira seluk, tanba ema nia cultura no características antropológicas la hanessan makassae, mambae ka baikenu oan sira nian, maibé fiar ida de’it, Kreda ida de’it no ita bele hetan nafatin elementos balu iha realidade pastoral específica ida ne’ebé hanessan iha fatin hotu-hotu iha Timor laran tomak.

Temas ne’ebé trata iha relatório ida-ne’e, tanba kona assunto ida-idak superficialmente, sai iha tempo hanessan convite atu agentes da pastoral bele hakle’an sira ho estudos seluk, hanessan amo-bispo sira halo iha livro “Mai Haré Timor: Reflexão Bispo Timor-Leste sira nian kona-ba realidade Timor-Leste tuir naroman Evangelho, iha biban tinan atus lima Missão nian”, no ha’u rassik buka halo daudaun iha blog www.haufiar.com.

Iha tinan ruma nia laran, Pastoral ba Ema ho Deficiência fó biban mai ha’u atu visita fatin barak no hatene ema barak iha diocese Baucau. Tan ne’e, maski atu simu daudaun knaar foun iha rai Portugal, Timor-Leste no Timor oan sira sei hela nafatin iha ha’u-nia fuan no oração tanba iha tinan hirak ne’e nia laran ha’u conhece katuas no ferik sira ho histórias nakonu ho sofrimento maibé ho buat barak atu hanorin ba geração foun, ha’u conhece foin-sa’e sira barak ne’ebé tane ideal cristão aas tebetebes, ha’u conhece inan-aman barak ne’ebé hakarak duni hakle’an fiar sarani iha sira-nia moris loron-loron nian no ha’u acompanha labarik sira barak ne’ebé sei sai Timor-Leste nia futuro.

Ne’e duni, maski dificuldades ne’ebé ha’u hassoru nu’udar pároco iha Laleia iha bessik tinan lima nia laran, ha’u bele dehan ho neon ho laran tomak katak experiência ida-ne’e hariku tebetebes ha’u-nia moris nu’udar religioso no amo-lulik, tan ne’e, fó sai ba público relatório kona-ba realidade paróquia Laleia nian sai, iha tempo hanessan, oportunidade atu agradece ba sira hotu ne’ebé iha tinan ikus sira ne’e tulun ha’u iha ha’u-nia knaar nu’udar bibi-atan paróquia Laleia nian.

Quem está online

Temos 10 visitantes e 0 membros em linha

Página Facebook